Bhaja Govindam - Introduction

Select Transliteration   

ப4ஜ கோ3விந்த3ம் லிக்கெயொ ஜகத்3கு3ரு3 ஆதி3 ஶங்கராச்சார்யார்.

எல்லெ ஒண்டெ ப4ஜன்கன் க3வ்ர்ஹியெத்மெல்லொ, எமாம் வேத3முக் ஹொயெ ஸாரம் ஸேத்தே. தீ ஜதொ3, மெனிகு3க் "மீ ககொ3 எல்லெ ஜித்ரவும் ஏட் ஸேத்தே? மீ ககொ3 த4னம் தொ3டு3ஞ்ஜிலேத் ஸேத்தே? ககொ3 பெ3ய்ல் பில்லல் மெனி ஹவ்டி3லேத் ஸேத்தே? ககொ3 மொன்னும் நிம்மள் ந்ஹீ? ர்ஹத்தயொ காயோ? ஜிவ்ணமு லெக்கு காயோ?" மெனி அஸ்கி சிந்தொ கெரட3த்திஸொ எல்லெ ஸேத்தே. இஸனி சிந்தொ கெரரியொ மெனிக் தே3வுக் தெ3க்கத்தெ வாடும் ஜாத்தக் ஹரும்ப3ம் கெரஸ்.

ப4ஜ கோ3விந்த3ம் லிக்கெத்தெகொ3 பஸ்கட் சலயொ களள்ளுனொ. ஆச்சார்யார்னு கஸிம் ர்ஹாத்தெ வேளாக், ஒண்டே ஒர்ஸு ஹொயெ த3ல்லொமெனி, பாணினி லிக்கெ ஸமஸ்க்ருத வியாகரணுக் சொவ்த3ரியொ ஸியாஸ். ஒர்ஸு ஹொயெ கலமு மொன்னுக் அன்ட்சிலி, தே3வுக் பாய்ஞ் பொள்ளி ர்ஹாத்தெ ஸொட்3டி3, இஸனி ஜிவ்ணம் பூராக் நிஸ்தொ சொவ்தி3 ஞான் அவள்ளத் தெமாம் வித்தாக் கெரராஸ்னா மெனி விசார் பொட்3யாஸ்.

பு4லோகு3ம் ஜுகு3தெனு நிஸ்தொ சொவ்து3 ஞான் அவள்ளத் தெமாம்கின், ஆங்கு ஸுக2ம் வெக்கத் தெமாமுஸ் லயிஞ்சிராஸ், தே3வு சிந்தனாம் தெ3க்கானி மெனி களள்ளியாஸ். தெல்லெ ஸீதிகின் தெனு ப4ஜ கோ3விந்த3ம் லிக்கன் நிள்யாஸ். எல்லெ உகதீஸ் (31) பத்3யமும், அவ்ரெ மந்து3ன், ஜித்ரவு தெ4ரெ அவ்ரெ ஸனி அஸ்கி இவர் கெரிகின் அவ்ரெ அஞ்ஞான், பி4ரம்மொ அஸ்கி ஜவட3ராஸ்.

எகொ3ஹால், ப4ஜ கோ3விந்த3முகு3 "மோஹ முத்3க3ர" மெனி மெனன். முத்3க3ர மெனெத் மூர் (சுத்தியல்) மெனி அர்த்து2. அவ்ரெ மோஹமுக் மூர் க2ல்லி பொ2ட3ரியொ ஸொகன் ஸங்கி3ரியொ ஹால் "மோஹ முத்3க3ர" மெனி மெனுவாய். ஆச்சார்யார்னு அவ்ங்கொ3, த4னம் ஹோர், த3ல்லான் \ பெ3ய்லன் ஹோர் வித்தாக் ஆஸ்தொ பொட3ரியொ ஸொட்3டி3கின் ம்ஹௌஜனா ர்ஹாத்தெயொ காயொ (ஸாஸ்வதம்), ம்ஹௌஜை ஜாத்தெயொ காயொ (அஸாஸ்வதம்) மெனெத்தெகொ3 வித்3யாஸ் களள்ளி ஞான் பொந்தி3 ஜிவ்னொ மெனி மெனராஸ்.

எல்லெகொ மஹத்வம் தே3த்திஸொ, "மீ கோன் மெனெத்தெ ஞான்" ஜதொ அஸ்கி ஞானுன் தெண்டு3ஸிஸ் மெனி முஸட3ராஸ். எமாம், முது3ல்லா பத்3யம் லிக்கெத்திக்காம் பஸ்கட் வ்யார்யொ (11) ஆச்சார்யார் ப2ட ப2ட கெரி லிக்யாஸ். தெனு லிக்கெயொ ஸீதிகின், தெங்கொ2 ஶிஷ்யகோடினுன், ஒண்டெ சௌதொ3 (14) பத்3யமுனுக் லிக்யாஸ். ஸெத்லாம் ஆச்சார்யார் ஒண்டெ பாஞ்சு (5) பத்3யமுன் லிக்கி முஸட்3யாஸ். இஸனி, எல்லெ ஸம்பூர்ணம்கன் உகதீஸ் (31) பத்3யமுனுன் ஹொயெஸ்.

ஆச்சார்யார் அவ்ங்கொ அஞ்ஞானும் ர்ஹீ ஞானுக் வாட் தெ3க்கட3ந்தொ3.

ஓம் தத் ஸத் !!!